Күндү ааҕааччылар! 1935 сыллаахха Майаҕа аан бастаан библиотека тэриллэн үлэтин саҕалаабыта. Ол кэмтэн бүгүҥҥү кэмҥэ диэри киин библиотека нэһилиэнньэ, оҕо-аймах таптаан сылдьар, үүнэр-сайдар, билиитин хаҥатынар киинэ буолан үлэлии-хамсыы турар. Киин библиотека 90 сыллаах үбүлүөйдээх кэми көрсө гимн буолан ылланарга табыгастаах анабыл хоһоон айыытыгар улуустааҕы Куонкурус биллэрбиппит. Куонкуруска 7 хоһоон киирдэ – Майаттан, Дьокуускайтан, Төҥүлүттэн, Мэлдьэхситтэн, Аллараа Бэстээхтэн. Хоһооннор бары да хомоҕой тыллаахтар, кыттааччылар ойуулаан-оһуордаан, уустаан-ураннаан биһиэхэ анаан суруйбуттарыттан олус үөрдүбүт, сүргэбит көтөҕүлүннэ. Эһиэхэ баҕарабыт бу сайыҥҥы сырдык күн курдук куккут-сүргүт куруук үөрүүнэн сыдьаайа турдун, алгыс аргыстаах, дьол тулалаах сиэдэрэй олоҕу!
Библиотека үлэһиттэрэ бу хоһооннору билсэн баран маннык түмүккэ кэллилэр:
1-кы Үрдэл – Айталина Кошунова «Библиотека»
2-с Үрдэл – Лидия Андросова, «Билии киинэ – библиотека»
3-с Үрдэл – Надежда Сидорова «Кинигэ тутуурдаах кыргыттар»
Бары ааптардар Туоһу Сурук, кыайыылаахтар Добун Сурук тутуохтара.
Библиотекардарга анаммыт истиҥ тыллардаах ис сүрэхтэн тахсыбыт хоһооннору биһигинниин тэҥҥэ үөрэ ааҕыҥ.
Айталыына Хоһуунаба (Дьокуускай)
*** Библиотека ***
Былыр ааҕар балаҕан
Норуоппутун түмпүтэ,
Билии – көрүү суолугар
Дьаныардаахтык тиэрпитэ.
Припев:
Ааҕыы – норуот кылаата,
Дууһа байар төрүөтэ,
Санаа сайдар үктэлэ,
Киһи көтөр кыната!
Үгүс сыллар устата
Библиотека үлэтэ
Суолдьут сулус кэриэтэ
Сайдыы суолун ыйбыта.
Припев.
Библиотекарь идэлээх
Кыһамньылаах далбартан
Эдэр – эмэн барыта
Сүбэ – ама ылабыт.
Припев.
Сүүрбэ биирис үйэҕэ
Куйаар ситим сайдыыта
Үлэ саҥа көрүҥүн
Аартыктарын арыйда.
Припев.
Оҕо – аймах, дьон – сэргэ
Сылдьыҥ манна куруутун!
Сайдыы аанын тэлэйиҥ!
Чиҥ билиигэ үктэниҥ!
Припев.
Андросова Лидия Никитична (Төҥүлү)
Билии киинэ - библиотека
Кинигэни, сурунаалы
Кичэллээхтик кэккэлэтэн
Үгүс үйэ муспут баайын
Турунаҕыт дьоҥҥо тиэрдэн.
Хос ырыата:
Дойду устан ааспыт суола -
Өлбөт - сүппэт устуоруйа,
Онно тиэрдэр сырдык уота,
Билии киинэ - библиотека!
Тутуһаҕыт туруулаһа -
Омук тыла - кини тыына,
Ыччат - тылбыт сарсыҥҥыта,
Тулхадыйбат тулааһына.
Хос ырыата.
Иитиһэҕит өркөн өйдөөх,
Эр сүрэхтээх көлүөнэни,
Ийэ сиргэ бэриниилээх
Үгэспитин салҕааччыны.
Сидорова Надежда (Майа)
Кинигэ тутуурдаах кыргыттар
Ааҕар дьиэ ааннара мэлдьитин аһаҕас
Манна баар кыргыттар дууһалыын сайаҕас,
Кэрэҕэ угуйар, билиигэ ыҥырар,
Кинигэ доҕордоох кэпсээннээх эбиттэр.
Привев:
Кинигэ тутуурдаах кыргыттар
Эйигин кэрэхсии көрсөллөр,
Ып-ыраас ыралыы сырдыктар,
Кинигэ тутуурдаах кыргыттар.
Кинилэр биһиэхэ кэпсииллэр үгүһү,
Бэрсэллэр кэччэммэт сүрэхтэн үөрүүнү,
Кинигэ кэпсээнин артыыстаан көрдөрөн
Сыанаҕа тахсаннар долгутан ылаллар.
Ыллыыллар-туойаллар, хоһоон да ааҕаллар,
Ааҕааччы туһугар элбэҕи айаллар,
Кэхтибэт кэпсээннээх кинигэ кэһиини
Ыччакка кэпсээри утары ууналлар.
Назарова Октябрина Григорьевна-Уйгууна (Төҥүлү)
Ааҕар дьиэ
Сып-сырдык бу дьиэҕэ киирэҥҥин
Уу-чуумпу эйгэҕэ куустарыан,
Билиигэ-көрүүгэ тардыһан
Олохтуун биир тэҥҥэ хардыылыан.
Эйэҕэс хаһаайка. көрсүөҕэ
Саалаҕа атаара ыҥырыа,
Сурунаал,кинигэ арааһын
Таларга сүбэһит буолуоҕа.
Араас да тэрээһин ыытыллар
Саастаах да,эдэр да кэрэхсиэх,
Бу манна кэлэҥҥин умнаҕын
Бириэмэ ааспытын билбэккин.
Ол курдук тулаҕын умнаҥҥын
Урукку кэмнэргэ күүлэйдиэн,
Уус ууран кинигэ алыбар
Дьиктилээх турукка ылларыаҥ.
Андреева Акулина Егоровна – Иэйиилиинэ (Мэлдьэхси)
*БИЛИИ ТӨРДӨ ААҔАР КИИН*
(И.М.Сосин аатынан улуустааҕы киин библиотекаҕа ананар)
Айыллар тыллары холбоон
Айымнньы тахсар тиһиллэн,
Ол онтон билэбит элбэҕи
Ааҕар дьиэҕэ мустаммыт.
Ыраас сырдык дьиэҕэ
Сайаҕас үлэһит көрсүөҕэ,
Үөрэ көтө тиксэриэҕэ
Наадыйар эн кинигэҕин.
Кинигэ кинигэ эн бааргын
Бараммат билии төрдө,
Үрдүккэ эн таһаараҥҥын
Көтүттүн эбээт кынаттаан.
Оҕо эрдэхтэн абылатан
Араас омук айымнньытын,
Сахалыы номоххо таттаран
Ааҕар өйүм санаам барыта.
Уһун кэмҥэ сыралаһан
Ааҕар кииммит эн биэрдиҥ,
Хас көлүөнэ аайытын
Сырдык билии төрдүн.
Тихонова Алаайа Николаевна (Аллараа Бэстээх)
БИБЛИОТЕКАРЬ ИДЭБИТ
Ханнык да кэмҥэ
Аһаҕас ааммыт,
Куруутун мэлдьитин
Үөрэ көрсүөхпүт.
Кынаттаах курдукпут
Тэлээрэ сылдьабыт,
Кэчигирэспит кинигэ
Быыһынан хаамабыт.
Кинигэ аргыстаах,
Ааҕааччы доҕордоох,
Биһиги буолабыт
Библиотекарь идэбит.
Тургутук ыытаммыт
Билиини хаҥатабыт,
Сэргэхтик сылдьаммыт
Сэргээн кэпсиибит.
Алыптаах эйгэни
Арыйар эһиэхэ
Ураты умсулҕаннаах
Библиотека дьиэтэ.
Кинигэ аргыстаах,
Ааҕааччы доҕордоох,
Биһиги буолабыт
Библиотекарь идэбит.
Валентина Яковлева –Чэлгийээнэ
БИЛИИ СЭРГЭХ ДЬИЭТЭ
/И.М. Сосин аатынан библиотека 90 сыла/
Сырдык ыраас уораҕай
Дьону тардар аналлаах,
Билии киэҥ аартыгар
Сирдиир үлэһиттэрдээх.
Эн,мин,кини оҕо эрдэхтэн
Аанын элбэхтик аспыппыт,
Саҥа кинигэҕэ тиксэммит
Үөрэн дьоллонор этибит.
Санаабыккын сааһылыыр,
Толкуйдаабыккын тобулар,
Наадыйбыккын булан биэрэр
Үтүө үлэһит бибилитиэкэр.
Ааҕааччылар элбииллэр,
Араас үлэ ыытыллар,
Дьоҥҥо биллэр сэргэх сирбит-
Киин бибилитиэкэбит!
Уруй-туску үбүлүөйгүнэн,
90сылгын туолбуккунан,
Сайдар Майам бибилитиэкэтэ,
Билии сомсор дьоһун дьиэтэ!