Олоххо дьулуурдаах, тоҥ буору тобулан, күн сырдыгын батыһар... Кэрэ сибэкки Ньургуһун

Олоххо дьулуурдаах,
тоҥ буору тобулан,
күн сырдыгын батыһар...
Кэрэ сибэкки Ньургуһун.

Сиһилии

Семен Данилов
Бастакы ньургуһун

Үчүгэй да буолар ньургуйан

Күн өҥнөөх бастакы Ньургуһун.

Ып-ыраас амарах хараҕынан

Эрэнэ көрүнэр тулатын.

Тугу да, тугу да билиммэт

Дьолтон, күн санааттан ураты.

Ол иһин тымныыттан сэрэммэт,

Ньургуннук тобулар тоҥ буору.

Бастакы барыта ураты

Үөрүүнү, иэйиини үөскэтэр:

Бастакы күөрэгэй ырыата,

Кэҕэ кыыл чоргуйар саҥата.

Аан бастаан эн көрбүт ыһыаҕыҥ

Симэммит чэчирин кэрэтэ

Аан бастаан оһуохай ырыатын

Биир кыыстыын хатылаан дьиэрэтэр.

Оо, ханнык күн иэйии солбуйуой

Бастакы тапталбыт сулуһун!

... Үчүгэй да буолар ньургуйан

Күн өҥнөөх бастакы Ньургуһун.

Леонид Попов
Ньургуһун

Хатааһын буолтун билиммэккэ,

Хаар анныттан бу тоҥ сиргэ

Хайыы сахха ньургуһун үүнэ оҕуста,

Харалдьыкка хамсаабытынан таҕыста.

Күөх мичээринэн сүрэхпин көрдө, -

Кэри-куру санаабын кыйдаатым:

Мин үөрбэтэхпин бүгүн үөрдүм,

Үөрүү ырыатын бүгүн ыллаатым.

Хатааһын хагдарыттар даҕаны -

Хайаан да ньургуһун үүнэ туруоҕа:

Тоҥ буору тобулуом диэн андаҕары

Биэрбит быһыылаах Айылҕа-таҥараҕа.

Санааҥ саппаҕырар күннэригэр -

Санаан ыл намчы ньургуһуну.

Оччоҕо тулуйуон ыар түгэннэри,

Кыайыынан түмүктүөҥ охсуһууну!

Иннокентий Артамонов

Ньургуһун барахсан

Эн биһи кыракый

Сааспытын санатан,

Кырдалга тахсыбыт

Ньургуһун барахсан.

Тоҥ буору тобулан,

Силиһин тардынар.

Күн диэки дьулуһан,

Саас эрдэ көҕөрөр.

Тыллыбыт ньургуһун

Тырымныы хамсаата,

Үчүгэй урсунун

Тыал хоту хоҥкутта.

Кыыс буолан харалдьык

Кырсыгар наскыйда,

Уол буолан быһыйдык

Туос ууран кылыйда.

Харахпар аҕалла

Оҕо саас күлүүтүн,

Лыахтардыын сырсыһа

Күөх дуолга сүппүтүн.

Эн биһи кыракый

Сааспытын санатан,

Кырдалга тахсыбыт

Ньургуһун барахсан.

Бүөтүр Тобуруокап
Ньургуһун

- Эт эрэ эн миэхэ, ньургуһун,

Эйиигин дьон бары туох иһин

Биһирээн нарыннык таптыыллар.

Бэл диэтэ ырыаҕа ыллыыллар?

- Мин дьоҥҥо үөрүүнү биэрэбин,

Кэрэ саас кэлбитин кэпсиибин!

Семен Данилов
Ньургуһун

Бу ньургун ньургуһуннар

Тоҥ муус буору тобулбуттар:

Дойдубун симиир туһугар

Дьыбартан, хаартан чаҕыйбаттар.

Доҕоруом, эйиэхэ бэлэхтиэм

Бу хоодуот сибэккини,

Өйдүөҥ эн хоһуун сүрэххинэн

Ньургуһун туспа кэрэтин.

Елена Филатова - Сыгыйык
Ньургуһун

Сылластым, сылаас иэйиинэн

Саһархай бэйэҕин ахтаммын,

Сэрэнэн таһааҕын бигээммин,

Сэрбэйбит төбөҕүн уураммын.

Аттыбар саас үҥкүүтэ,

Араҕас оһуор үктэлэ,

Алааска олох тиллиитэ,

Айылҕа уһуктар эргиирэ.

Ньургуһун сиэттиһэр түгэнэ,

Тапталым эргийэр иэдэһэ,

Ньургуһун кыбыстар киэлитэ,

Талаһар эрэлим иэйиитэ.

Сиккиэр тимэҕэ сөллүүтэ,

Симиктик тэлээрэ көтүүтэ,

Ньургуһун төбөтүн өндөтүө,

Ньургуннук олоххо талаһыа.

Саргын кыыһа - Күннэй
Ньургуһуннар - ньургун куолар

Ыам ыйын илдьитэ - ньургуһун,

Ылааҥы күннэрбэр уһугун,

Тоҥ буору тобулан эн үүн,

Туохтан да толлума, көҥүлгүн.

Халдьаайы, томтор быарыгар

Харалдьык бөҕө тахсыбыт,

Эҥсиэлим хочотун сыырыгар

Элбэх да ньургуһун тыллыбыт.

Бу кэрэ, дьикти көстүүттэн,

Бу нарын, сэмэй үҥкүүттэн

Дууһам үөрэн ыллаата,

Дуйдаах хонуум алҕаата.

Кыыс оҕо намчыта буоламмын,

Кырдалга бүтүннү сууланным,

Кырдьык да, ураты хартыынаттан

Кынаттанным утары хардаттан.

Ньургуһун сибэкким ытарҕам буолаҥҥын,

Нуоҕайа наскыйан сааскыбар ууллаҥҥын,

Нуурал күн сүргэбэр туолаҥҥын

Нуктаабыт бэйэбин таптаа уйаҥҥын.

Ыам ыйа илдьитэ - ньургуһун

Ылааҥы күннэрбэр уһугун!