Көбүөрдээх муостаҕа

Күнтэн тыкпыт "чүөччэҕи"

Көрөөт,

Көтөхтөрөн олорбут уолчаан

Амтаһыйа аһыыр - сиир күөрчэҕин

Антах - сыҕарыччы аста,

Муостаҕа түһээри

Муйгуоласта.

(Күн көмүс толбоно күндүтүк көһүннэҕэ!)

Кыра мыппа тарбаҕынан

Кытаахтаста, кыайан ылбата.

Толору эттээх - ботуос ытыһынан

Тоһуйа тутан

Ийэтигэр күнү көтөҕөн биэрдэ

Итиэннэ илиитин тэбэннэ.

Иккитин туола илик Ньургустаан

Ийэтигэр итинник,

Күн көмүс кыырпаҕын

Көтөҕөн - уунан турардаах.

Мантан ордук, ийэҕэ оҕоттон

Маҥнайгы кэһии,

Бастакы булумньу

Баар буолуон сатаммат.

Сайылык тыатыттаан

Самолет көтөн эрэр,

Самолет көтөн эрэр.

(Сабаччакый кыракый).

Түннүкпүнэн киириэн,

Түһүөн олус баҕардым.

Түһэригэр, баҕар, иҥниэ,-

Тюлбун туран арыйдым.

Тэлэйэрбин кытта

Тэмэлдьигэн кэллэ.

Көтөр аал диэбитим,

Көрүҥ,- атын эбит дии!

Өтөнүгүм үөттэ,

Кэҕэкийим кэпсээтэ,

Балыкайым ыата,

Моҕотойум угуйда.

Ындыылардаах былыт,

Ыаҕастардаах уунан

Ардахтары суккуй,

Ачалары сууйууй!

- Куруҥ тыаҕа

Кучу оту

Кур-хар үктүүр

Курдук, тугуй?

- Куттаныма

Кутуйахтар,

Уоллуун-кыыстыын

Отоннууллар.

- Куруҥ тыаҕа

Кумалааҥҥа

Куһугуруур

Курдук тугуй?

- Куттаныма,

Кукаакылар

О5олорун

Оонньотоллор.

Сарсыардааҥҥы

Сахалыы аспыт

Симиин күөччэх

Сииргэ астык.

Кэл эрэ, ыалдьыт,

Кэпсэтэ, чэйдээ.

Күндү астан амсай.

Күөччэҕи мэйдээ.

Мин ийэм күөччэҕэ

Мип-минньигэс.

Уоллаах кыыһым, көрбүттэргэ:

"Умса тут, тиэрэ эргит,

Удьуордаабыттарын баҕаһын.

Үктүүрдүүн, көрөрдүүн адьаһын,

Үтүктэн-сүһэн үөскээбиттэр,

Үкчү аҕалар..." - дэттэргит.

Оо, оҕолорум барахсаттар!

Оннук хаанынан ууһаатаргыт!

Куһаҕантан куруйар, кыбыстар,

Кэрэни кэрэхсиир этим.

Сээркээн сэһэн кырдьаҕастар

Сэһэннэрин сэргээн истэрим.

Өбүгэ саҕаттан оҕо анала -

Аҕа аатын ааттатарга.